دولة مدنية بمرجعية عسكرية!
أيوه، هيه دي للأسف مصر الي احنا ماشيين في طريقها دلوقتي … دولة مدنية بمرجعية عسكرية
يعني مش بعيد نكمّل قول ييجي 40 سنه كمان في حكم عسكري ونتمم المئوية وكل سنة وانتو طيبين :)
طيب ليه بقا؟
من يوم موقعة الجمل مروراً بسلخانة المتحف وموقعة المشير (9 أبريل) والهجوم علي ماسبيرو وحتي فضّ مظاهرات السفارة فيه أسئلة مالهاش تفسير عند المجلس غير الإنكار أو محاولة قطع أي شئ يوصل للحقيقة أو إنه يشغل الناس بحاجه تانيه مهمة برضه بس مش في نفس أهمية الجرائم الي ارتكبها المجلس وكمية الدماء الي استباحها باسم إدارة شئون البلاد!
نفس السياسة الي بيتبعها المجلس (الي بيقولوا عليه ما بيفهمش في السياسة!) هيه نفس سياسة مبارك بالظبط، والله يكاد يكون مبارك بس وزّع علينا الكوارث دي علي مدي 30 سنة
فلذلك الناس مش حاسّه ومش حتحس بالتغيير طول ما المجلس ماشي بالنظام الحالي، وده شئ طبيعي ولعل الحال الظاهر للناس إنه الدنيا أسوأ كمان من الأول لأنه مفيش بلد بتخلّص عالفساد فعلياً في 18 يوم
فلذلك تعالوا نتفق علي شوية حقائق:
1- مفيش مطلب من مطالب الثورة اتحقق من غير ضغط (اللهم إلا الغاء التوقيت الصيفي .. خلينا منصفين :) )
2- المجلس مستحيل (بالنظام الي ماشي بيه) يحاكم أي رمز من رموز الفساد لأنه كان جزء من نفس النظام وله أخطاء زي أي حد سهل يكشفها أي واحد منهم
3- المجلس مستحيل يمس مبارك تحديداً لأنه كان كبيرهم يوماً ما علي أقل تقدير إن لم يكن هناك إتفاق قبل التنحي (قصدي التخلي :) )
4- المجلس (بالنظام الي ماشي بيه) مش حيسيب فرصة لرئيس مدني بعد كده ييجي ينضف كل الي عملوه بعد كده ويحاكم مبارك مثلاً (علي أقل تقدير برضه)
فهل ده المجلس الي احنا عايزينه يستمر في تحقيق مطالب الثورة؟هل إحنا متخيلين إن فيه ثورة في التاريخ قامت عشان تهدم الفساد، وبعد فترة يا عيني إكتشفوا إن الفاسدين دول كلهم براءة؟
هل منتظرين مثلاً اليوم الي يمسك فيه البلد حاكم عسكري جديد (شفيق أو عمر سليمان) عشان يؤمّن النظام الي فات عالاقل مؤقتاً؟
هل احنا منتظرين اليوم الي نشوف فيه صورة المشير علي تي شيرتات الشباب (زي جيفارا) علي إعتبار إنه مفجّر الثورة وملهمها؟
لذلك لازم ننزل نضغط علي المجلس عشان يستجيب للمطالب الأساسية للثورة، وده رأيي وشايف إننا حتي لو أخدنا موافقة علي المطالب مش المفروض نتحرك من مكاننا لحد ما تكمل المطالب بالشكل الي حددته الثورة
وبرغم معارضتي الشديدة للمجلس الي في نظري خان الثورة وباع دم الشهداء بتحية وشوية كلام فارغ إلا إنه وجوده بأخطائه وتصحيحنا ليه بوجودنا في الميدان هو الحل الي باقي لنا حتي الآن عشان ما نعيشش في دولة مدنية بمرجعية عسكرية!
